訪問篇-戲人戲語

18/06/00 － 22/06/00 阿梅出現新城電台《女人．網絡》節目接受 Anna 訪問。

18/06/00 (星期一) 訪問內容：『談新唱碟 I'm so Happy 』

咁耐無見梅姐，第一句好想好想同佢講的就係：「渴望得到一張唔係《 I'm so Happy 》，想得到 o既係一張未係加印的原裝版本。由剛剛經過隧道口，見到張 poster 開始，我已經返 o黎同人講我好鍾意。

係唔係覺得，幾唔以梅艷芳個樣 .... 哈哈 .....

你影呢個唱片封套的時候，有冇覺得呢個唔係自己，唔似係梅艷芳？

我無喎，我係完全好信晒 Wyman 。今次整個唱片封套的構思係 Wyman 同蔡一智諗，佢地話想我「撇開」以前個樣，唔係咁 Stage 的梅艷芳，比較似番人，佢地成日話我無乜「人氣」哈哈 ..... ，感覺上同大家的距離太遙遠，不如今次玩 o的新感覺。

終於，今次如果大家見到其他的相，會見到我打波、玩貓、食雪榚、食波板糖，咁今次會多的選擇，你會覺得梅艷芳唔係咁「死板」，係另外的一 o的 o野，其實私底下 o既我，係幾多樣化，幾鍾意好動的人，雖然我無乜 o野「精」，我打波唔叻，游水又唔係叻，（ Anna 插口 : 你跑步叻呀！）哈 ..... 我跑步都唔係叻呀，不過我勝在耐力夠，想俾人睇到多 o的我好動的一面！

其實自己好多時有唔同的變化，或且希望自己俾更多唔同的東西俾大家睇，例如件 T-shirt 點解會影響大家駕駛，因而要改？唔會唔覺得大家唔「化」呢？

我係覺得香港的例好奇怪，其實件 T-shirt 只不過係個公仔，又唔係話好三級，我覺得個公仔的 pattern 幾靚，係我 o既角度 o黎睇，唔知香港係特別保守，定係間唔中保守，你有時睇佢好似好開放，突然間佢又覺得你呢樣 o野好唔 o岩。可能係某情形上，係隧道口佢會覺得驚駕者望， and then 會有問題，但呢種事，我唔係先例，好多人都有試過。好多 o野比我呢個更加吸引，更加影響駕駛者的視線添，但係佢地又唔 lock ? 其實呢的都係一個運數，呢隻碟真係一波三折，幾多問題存在！

不過我自己開心的係，張相出到 o黎， o的人未聽裡面的歌，只係睇到張相，好多記者朋友打電話俾我，同我講「好正」、「好清新」、「好新鮮」、「好可愛」，佢地的反應係覺得呢個係一個全新的梅艷芳。大致上，大家都接受梅艷芳有另外的一個樣，幾開心。

雖然係有好多 o野好辛苦，頗多的麻煩，但去到最後都覺得係開心。我覺得封面幾得意，個樣怪怪地咁，有小小蠱蠱惑惑！

阿智同 Wyman 你都好熟，佢 o地都算係後輩，會唔會覺得佢 o地有時會有說話初時唔敢講，你叫佢地講，佢 o地先敢講的情形出現呢？

唔會呀，其實我地一開始做呢隻碟的時候，我同阿智、王雙駿一齊開會，大家放低晒自己的身份，你當我係一個新人，我其實係需要新的元素，由人地話俾我知我需要乜 o野，因為自己睇自己好難睇到有乜缺點，同埋有乜 o野係需要改，尤其唱 o左咁耐歌，要慢慢去「洗底」都幾難，佢地大致上都知道我想要 o的乜 o野，佢地係幾大膽，佢地接 o左呢個 job 之後，開始搵填詞人林夕、 Wyman 等好多人，叫佢地「放低」以前的梅艷芳，用佢地的角度寫一個全新的梅艷芳。

但係你自己難唔難「放低」呢？

我「放低」 o左 o架啦，我自己 24 小時可以隨時都「放得低」。

換過另外一款出 o黎！

係呀！係呀！

點解會搵阿智呢？

其實上一次我地合作過《艷舞台》隻碟，佢都幫我監製好多隻歌，成隻碟大致上都係佢 handle ，我覺得佢係呢方面的才能係幾好。同埋，要搵一個音樂人熟識自己，溝通同默契方面我地都有，佢又屬於新派的音樂人，所以我覺得佢有好多空開可以去玩，我又幾信任佢啦。佢做的 o野我從來都唔會過問，佢話呢隻歌好，咁我就會返屋企聽入腦， and then 快 o的吸收唔同 o既感覺。

其實係唔係每次同每一個音樂人你都係咁，俾晒佢話事，放晒手？

係！因為真係要佢做我隻碟的 producer 的話呢，我會係完全信晒佢，我覺得如果成日都用自己的感覺去做，人地會好難做到 o野出來。如果信得過佢，基本上就俾佢全權負責，自己只係負責唱個 part 。

我前幾張碟，好以俾人定 o左型，一定係「哀怨」、一定係「失戀經驗好多」、比較「悽慘」、「渴望愛情，被愛的女人」，永遠都係困係呢個框框。阿智話其實應該跳出呢個框框，唔好再俾人覺得係咁樣，唯獨是咁樣歌路先會來一次轉變。咁我聽完之後，覺得佢分析得幾好，咁我話好，我盡量去試啦，因為果陣時我都唔知自己做唔做到。

音樂方面交俾阿智， image 方面點解會搵 Wyman ？

搵 Wyman 其實係幾得意，有一日我錄緊佢的歌，佢同我講話好想試下做形象設計，咁我地就一齊合作玩 o下，我都想同唔同的人合作，可以擦出唔同的火花。 Wyman 之前未做過呢樣工作，佢又覺得好新鮮，咁對於我來講，我又覺得幾新鮮，係大家無壓力（我唔知佢有無，我就無啦），我地去嘗試，係 studio 影相我都好開心 o架，完全無緊張。佢叫我食雪榚，咁我未食囉，食食 o下「溜」晒落 o黎，佢就係要呢種感覺！

佢同你講的時候，你有無覺得「好唔好呀，得唔得 o架」？

我無喎，唔知點解呢，我從來唔諗 o的 o野，我乜 o野都試下先！你話我好保守又得，我可以留係一間公司十幾年，我可以食飯成日都係食個間。但某方面，我又好鍾意嘗試。

合作過之後，你覺得 Wyman 個人又點呢？

我覺得佢好多方面的才華都有的，唔係只係做一個 DJ ，或且寫歌詞，如果今次當係一支強心針的話呢，我希望佢以後會有更多不同類型的東西會出現的。

19/06/00 (星期二) 訪問內容：『談散文集．談海琪』

碟內附送的散文集，入面有十個故事，都係來自海琪的手筆，何解會搵海琪？何解又會有呢個構思呢？

我地初初的原意係諗住寫十個故事，配合碟內的十首歌。十個故事係從我自己演變出來的，（ Anna 插口：同歌有冇關係呢？）後來慢慢轉變到好以無乜關係。

我講 o左十個故事俾海琪聽，有我「童年」、「愛情故事」、或且係我「日常的生活」，我自己的感受。大家都知，海琪本身係一個好感性的人，佢聽 o左個樣 o野，係佢的角度唔一定覺得呢個係梅艷芳，佢一定會用佢自己的感覺，去從新再編一次梅艷芳究竟係一個乜人？呢個係最後 end up 出來的 o野。

我睇的時候會覺得，有 o的事情佢（海琪）係唔係寫緊自己呀？咁你睇番有乜感覺？

我睇番個感覺係幾強烈的海琪，佢會用佢的角度去睇，咁呢個係海琪，（ Anna 插口：你覺得有幾多係寫你自己？）有 60 % 係海琪， 40 % 係我啦！

我識佢的時候，我諗佢第一個感覺會 feel 到我幾 cool ，我又 feel 到佢幾 artist ，幾 cool ，大家都係有 o的內涵，我會覺得佢有 talent ，佢會覺得我有「計」傾，因為大家係某方面的思想幾接近。佢好多時會替我抱不平，某個角度我同佢的性恪有小小出入，就係佢感性得來係幾女性化，我感性得來係幾男性化。我係豪情個隻，有好多 o野唔係女性講的，類似係義氣，義薄雲天 ..... 呢的無聊 o野啦，同埋我無乜計較的，唔一定係金錢上，好多時佢會替我不值，佢會同我講：「你好多時被人搵 o左笨！你知唔知呀？』其實我知 o既，但係我的角度來講，總之唔係有好大的傷害的話，我知被人搵笨，但係我有得被人利用， OK 啦！無乜所謂啦！

唔會覺得唔低？唔舒服？

我覺得人諗得太多先會唔舒服，所以我係其實盡量唔去諗呢的 o野。我覺得朋友或親人，都係一個緣份，朋友其實係你的生命中，都係一個過客，好少會有一個朋友天長地久陪你一世，就算係「老公」「老婆」都未必可以。某一段時間識呢班朋友都係一種「緣份」，慢慢呢班朋友離開你，又會識過另一班朋友，咁都係一個「緣盡」，我覺得無乜話可唔可惜。

人會不停長大，搵的對象，識的朋友要求會唔同。細個時候搵的朋友係鍾意玩呀，跳舞呀；慢慢大個的時候，希望搵的朋友係講 o野多 o的，希望佢年紀會大過我，可以學多的 o野；到依家好多時可能係佛學上的朋友，鍾意傾佛計，其實佛計入面有好多人生的哲理，聽完之後會覺得好過癮，我會鍾意同呢 o的朋友一齊，我諗唔同的時間，會有唔同的朋友會出現。

但係朋友嘗試係你身上搵著數，因為知你唔計較而出賣你的時間 .......

我成日都講，係我唔好覺得被傷害的情況下，我唔係好介意所謂的一種「利用」，我覺得如果我被你利用得起，總之你唔好傷得我太深，唔好傷害友誼，其實 OK ！

佛學之中有邊句說話，突然之間會令你覺得開竅 o左？

有好多！例如一句好簡單的說話，真係「施被受，更有福！」好似頭先我所講的被人利用，其實都係一種「施」，唔好計較有無回報，其實都好開心，因為我覺得我有用途先會被人利用，或者佢利用到我可以幫助到佢的話， Fine ， OK ！我覺得呢句說話解到好多我心中的結同埋所為 o既不忿，我會覺得幾大用途，你可以話我「阿 Q 精神」，但我覺得「施被受更有福」的話，我 o既「福」一定被你多，哈哈 ..... 。

我覺得每一樣 o野都係「緣份」，或且我要被佢 o厄的時候，我未諗一諗，可能上一世我欠佢。若知今生果，睇你上一世點樣做，若知下一世的果，睇你今生點樣做囉，我覺得幾得意 o架！睇《達摩傳》睇番來的 ..... 哈哈！

20/06/00 (星期三) 訪問內容『談朋友．談徒弟』

朋友之間的交往，係唔係唔需要成日見面，久不久見一面已經足夠呢？

我覺得基本上係，人總有自己的私生活同埋有唔同的時間，我想選擇見呢個朋友，咁佢都會選擇去見任何人。有 o的朋友可以一個星期見一次或二次，有 o的朋友一年都見唔到十次，咁但係我覺得無壞 o架。一個電話一個問候，有心就可以，因為大家都知，都了解大家都忙。但係唔係忙到連個人都唔記得呢？又係另一樣 o野。電話係一個訊息，係一個問候，一個心意，我覺得間唔中一個電話，對於我 o黎講，已經係好好。

我覺得如果朋友有任何問題的話呢，梅姐都會赴湯蹈火，如果幫到佢都會幫的。

係呀，我會盡力！

如果 touch wood 你有問題，要人幫你，你覺得身邊多唔多朋友，同樣地，同樣付出，赴湯蹈火去幫你呢？

都有！其實我覺得自己幾幸福，點樣講呢 ..... 唔知係唔係相對，即係你付出咁多，人地同樣會同一時間同一種心態。例如我有唔開心，有事的時候，真係會有幾多朋友打電話俾我，佢未必會幫到你任何 o野，但係佢會關心你，呢個係精神上的一種支持，咁個件事最後解決都係自己，因為無人話可以完全幫得晒你，但有 o的人會幫你分析意見，有 o的人會俾 support ，或且簡單地一個問候，咁你會覺得其實無乜咁大的困難，係你自己有時轉牛角尖，有人同你講兩句，你會突然間覺得開竅咁。同埋，最緊要係身邊有朋友的支持，我諗呢樣係最大的幫忙。

梅姐好多事情都諗得好開，咁工作方面呢，除 o左出碟，遲 o的話會出書，除此之外，都有訓練新人，栽培新人。

係呀，最近成立 o左一間我的製作公司，咁我其下有兩個 Artists ，係我的角度來講，我以前都有咁樣的經驗，訓練過草蜢，安仔或譚耀文，我唔係點樣特別的訓練，但係我覺得用我的方式，我帶佢地多 o的舞台經驗，久不久訓下話啦，用我的方法的幫佢地點樣入呢個圈。我會將我所識的盡量教兩個新人，阿智都好熱心去做呢樣 o野，佢都幫我一半的忙，好多時候我自己比較忙，佢又會幫我 take care 佢地。

依家做新人都好難做喎，好難搵，你覺唔覺呢？

我諗我地做 o野的方式同出面的大公司唔同，我地唔會 protect 晒佢 o地全部，我 o地其實想佢 o地自己去 training 自己，我地俾個機會你，但係樣樣事都要自己落手落腳去做，我地唔會搵一架車跟住，然後十個助手，髮型師，我地無呢 o的。有需要的我 o地公司會 support ，但係盡量都係希望佢自己，因為呢個過程中係我自己感受番 o黎，我做新人係華星的時候，都係無人 take care ，乜都自己，除非上電台有人會帶你去，其他的無 o架啦！

劉培基唔會同你跟晒所有 o野事？

無 o架！ Eddie 其實都係好忙，佢係一個大師，佢係會幫我 design 演唱會的衫，平時久不久捉我去上堂，話俾你知今年興 o的乜，流行 o的乜，你自己搵啦！

我以為你每次出來，佢會幫你執晒？

唔會 o架！佢唔會全部幫你睇晒，佢係會教你。其實我覺得咁係好，因為過程中會學到好多，起馬我識自己化粧、識自己整頭，不過有時懶，費事啦！唔係咁大場合，我係可以自己搞掂晒，呢個係一個幾好的 training ， train 到依家我覺得面對任何的問題，我都可以 handle 。

輪到依家我去訓練兩個新人，我都係用緊呢套方法，我幫你接 job ，後面的都要自己去做，即係佢 o地拍電影，做其他 job ，自己去，唔識的我會搵人帶你，但係其他的 o野都係要自己去做。如果有 concert ，或且有工作需要髮型師，公司會 support ，但我要佢明白，唔係公司必然要俾，個過程中係你自己學到 o既先係最重要。

新一批的歌手，其實有好有唔好啦，對於佢地來講當然係幸福。但另一方面，其實係減低佢地學習的機會。尤其前一段時間，因為依家的唱片公司，市場唔係咁好所以都減好多人手。唱片公司好的時間，基本上一個 Artist 起馬有六個人跟住，有無咁的需要呢？我就覺得，只不過係幫佢助大的聲勢。

有好多如果做了幾年的 Artist ，佢會知道乜係事實，有的係虛幻。有好多新的 Artist 唔識分的話呢，自己對眼係濛閉 o左，以為呢個係事實，以為自己已經係最高，無心再去往上爬，佢會覺得身邊有咁多人，唱片公司咁鍚我，我已經紅啦，掂啦，唔會有心再去上一步，我會覺得會有少少驕傲。近呢一兩年，唱片公司又開始慢慢轉方式，可能無咁多人俾到佢地，咁係某個程度上佢地都 protect ，因為有經理人公司或者有唱片公司會搵起碼兩三個人跟住。

我一路都有去 warn 緊我兩個新人，你所有現在見到的都唔係事實，你的事實同埋目標唔係係你眼前，係應該更上，係未睇到 o既，我會成日咁樣同佢地講。今日你行得入 o黎呢間公司，好 small potato 的公司，但係我地會係好用心，大家都會落手落腳去做，無分你我，你有需要的我地去幫手，全力 support ，但你唔好諗住放開手腳唔理，等人理，無 o架，大家都要參與。

目的都為打好根基？

係呀！同埋我地係無大老闆係後面 support ，我地係兄弟姊妹公司，請 o的人返來幫佢地手接 job ，大家互相扶持，互相幫助，等佢地成長！我覺得對於新人係好的發展，係健康同埋良性的一間公司。

咁你選新人的時候要有乜條件？

條件就係要捱得，受得鬧，其實一路以來都有的人叫我收佢做徒弟，咁我覺得唔係收佢做徒弟咁簡單，呢個係一個責任，我要點樣去幫，點樣去做，係我的責任，我做唔到的話，我會覺得好失敗，壓力係辛苦過自己搵工作俾自己。同自己傾條件的時候好簡單，好的就做，唔好末唔做囉。但係幫佢地傾的時候，要幫佢 o地諗埋佢 o地的意識，有無出路呢？係唔係對佢 o地好？係未錢少 o的暫時都無乜所謂呢？最緊要係做好件事先，但係要佢地明白呢樣 o野喎，如果佢話你都唔幫我爭取好的價錢，咁你遲 o的有知明度，有實力的時候，點爭取都得啦，依家呢個時間唔係講錢 o既時候，係講點樣俾多 o的實習的機會。

呢兩位新人 Samuel 同何韻詩捱唔捱得呢？

捱得！我欣賞佢 o地的地方係佢 o地係好少會埋怨，我講一，佢地好少會話二。

咁上一次你心理副導係乜事？

上一次 ..... 我諗佢地都總係後生，好多 o野總係好 confuse ，唔知點樣的時候，咁咪要心理副導佢囉，覺得自己唔知點的時候，咁又會副導下佢囉。話俾佢知你一定要做，呢個世界無免費午餐食，如果見到人 o地成功，必有因素，無得羨慕，也無需要妒忌，我覺得你做幾多，有幾多又會係番你面前。

舊陣時我地聽過有好多，被捧的藝人唔可以拍拖，戀情唔可以公開的，咁依家打開報紙都覺得唔係啦，好多人的戀情都好公開的，咁對於你來講呢樣 o野緊唔緊要呢？

我覺得唔緊要，因為呢 o的係自然的，同埋係人生的階段，我反而會 push 佢 o地去拍拖，咁先會長大，佢成日都唔拍拖你先驚呀，你都驚佢唱歌的時候何來搵 feel 呢？咁拍戲的時候乜叫做愛情呢？乜叫做失落、乜叫做失戀、悲情都唔識，一定要得過失過，你然後先會知道珍惜，從中又學到好多 o野。咁有機會拍拖的應該比佢去。

公唔公開呢？

公唔公開 ..... 我覺得順其自然啦，即係你又唔需要街頭擁吻啦，但係又唔需要偷偷摸摸，去到某一個程度，大家都好定的話，認定對方係伴侶的話，咁我覺得係好自然的，如果你控制佢唔俾佢拍拖，反而會有反效果，無心工作，最慘係個心成日掛住，但又唔講得出來，重唔好添。

21/06/00 (星期四) 訪問內容：『談何韻詩．談陳奕迅』

講開新人，今晚都想問下梅姐，對於兩個新人有乜感覺呢？有乜意見俾到佢地呢？除此之外，呢張專輯阿詩作 o左首歌，咁呢首歌特別之處係乜呢？點解用呢首歌，係唔係好多好多唔同的選擇中選呢首呢？

唔知佢聽唔聽到，希望唔好讚壞佢，佢幾有呢方面的 talent ，佢又幾肯去做，因為佢無工作就會返公司，因為公司有好多人做緊 o野，阿智做音樂呀，做 Mixing ，咁佢咪聽纙，佢自己又吸收到，又學結他，依家又好似學緊其他 o野，佢自己有心機去做呢樣 o野。阿智又幾大膽，叫佢寫隻歌試 o下，佢一寫就寫 o左呢首歌，我地大家聽完之後都覺得 surprise ，一個咁新的人，可以寫到的 o野出來，我地大家都覺得，得 o架喎！

同埋我 surprise 個 arrangement 係咁簡單？

係呀，初初佢做的 demo 俾我聽的時候，係乜都無，只有佢自己彈的結他，就係咁簡單。我覺得，呢隻歌越簡單越好，復雜就變 o左無 o左佢的風格，我覺得盡量保留番原有的 o野，所以我 o地用好簡單的音樂。

由 17 歲開始有乜係最難忘呀？

由 17 歲開始 ....... 其實係想話俾大家知我由 17 歲開始入 o左華星 ..... 哈哈，到依家十幾年啦，十幾年後睇番我的以前係點呢？無論係工作上或是感情方面，都有幾大的轉變。人地話如果俾你再來過，你想唔想試多一次 17 歲？我有幾大興趣，如果有得時光倒流的話，我又想返番去 17 歲喎。

係唔係 17 歲呢？還是另一個年份呢？

我想返番去 17 歲先，因為果個年份可以做好多 o野，好多 o野可以係從新再來過，個腦總可以入到好多 o野，咁可能我唔一定要唱歌，可能做第二樣 o野。

如果真係俾你返番去呢？

可能真係會轉做第二樣 o野，我可能會專心讀書，我會做一個好出色的律師 ..... 不過淨係幫《正義》打工。

咁未賺唔到錢？

係呀，賺唔到錢，我永遠都係果 o的 o黎，或者做一個女警。

其實我問過好多 Artist ，如果返番轉頭，返唔返？好多都答：返，不過唔入呢行，點解呢？

係呀！我諗係好實際，做個行，真係會厭個行！娛樂圈係一個大染缸，跳 o左入 o黎好難爬番返去，因為出去無論做乜工作都係一個壓力，例如話你去做 Sales ，有的人會覺得降低身份去做 Sales ，好慘！其實無 o野 o架，但有無人可以完全睇得咁通呢？係幾辛苦，當你無知名度，你就無壓力，做任何 o野，俾人鬧，低 o架！做邊一個行業都會有唔同的經歷，咁係唔係轉行就係好，我又覺得未必喎，或且你依家俾我做一個秘書，或且第二樣 o野，我又會憎呢，其實係一樣之 o麻！

諗番 17 歲，一件事做得最 o岩的係乜事呢？

參加新秀囉，哈哈 ..... 真係 o架！因為如果我唔係參加個次的話，我根本以後的夢想 ...... 我細個的夢想就係有一個好大的 Stage ，個舞台係完全屬於我的，所有人入 o黎聽歌的都係聽我的，呢的係一個夢，細個的時候唱歌點會諗咁多 o野，點會諗呢個夢會變現實呢？夜晚睡覺時諗一諗都笑到 hehehehe 。就係因為我參加呢個比賽，有呢個機會俾我，我剩著呢個機會去實踐自己的夢想，心裡面的夢想真係可以實現，唔係咁多人做得到，所以我無後悔。有好多人問我有無後悔，我無後悔。不過問我再唔再想 17 歲做番呢行，我又唔會喎，因為我想試 o下第二樣 o野，自我挑戰的話，我想試 o下第二樣才能有無呢？得唔得呢？

我唔知人地的想法係點，但係我自己真係磨練出來的，我係因為好細個開始唱歌，大家都知，大家都聽過，所以唔洗講。咁慢慢變 o左我的職業，我可唔可以係自己的職業做到最好呢？點為之最好，起碼可以做自己的個人演唱會，做到我係舞台上鍾意點做都得， and then 會有好多的掌聲，入場的人係為我而來的，呢個作為係自己的崗位，我覺得滿足 o架！

其實每一次演唱會的時候，個歌手覺得自己成唔成功，係聽現場的反應，佢 o地俾你的掌聲，俾你直接的反應，你就知道你的成功感有幾多。個樣 o野其實係好似中 o左毒，每一次都希望下次更多更多更多，咁有時就會做埋 o的危險動作，但求俾人有視聽的娛樂。

某些工作係會令人上癮。

係呀！係呀！

除何韻詩之外，碟內有一首歌係 Eason 作歌兼合唱，何解會選 Eason 呢？

我欣常 Eason 唱歌的個種《字型感》，佢無乜刻意點樣去 design 去唱一首歌，咁我把聲比較奇怪，唔係好女仔聲，因為把聲比較沉，有時要講 o下感覺，有時同男歌手襯起上來，會分唔出邊個男邊個女，失 o左隻歌的意思。同 Eason 合作佢會俾到 o的唔同的 o野我，係我自己都未試過未玩過的，其實我地中間有一段係 Rap Talk ，但係商品問題最後都要 cut ，我覺得我同佢合作，中間有一段 Rap 好好笑，我地錄 o左成十次，大家都坐係度係咁笑，個段 Rap Talk 好 fit 首歌，但無辦法啦，係人 o地的廣告歌，係有少少遺憾 o架。

22/06/00 (星期五) 訪問內容：『談自己．談電腦』

上一次真真正正開壞大笑，唔係應酬大家的笑，係幾耐呀？

死啦！唔係好記得添，我真係唔係好記得！開懷大笑對我係幾難都的 o野，因為無乜事可以令我開懷大笑到忘晒形。我有時會係開心，開心可能係成班朋友傾計，傾得好得意，開心，開懷大笑 ..... 試過有一次發夢笑醒就有，但唔記得個夢係點，我係自己坐起身都笑緊。

有無覺得好耐無試過惜懷的感覺？

係呀，其實幾懷念的！唔知係唔係人越大呢，思想開始越復雜，越復雜你就越搵唔到以前的純真個種感覺，可能好少的 o野都已經好開心，我以前睇笑片，我記得好以係睇《半斤八兩》，我可以笑到「Sir」 o左落去，睇睇下朋友唔見 o左我，因為我笑到碌 o左落地下，透唔到氣，以前得 o架囉！後期我拍《審死官》的時候，又係咁樣，係現場拍緊，係笑到無辦法收口，笑到呢眼淚係咁流，我同星仔兩個都唔知點解咁好笑。

但係個隻笑係好工作？

唔係 o架，係開心的，係開懷！因為我拍《審死官》係開心，唔知點解，可能係我同星仔有好多火花，佢又好鍾意有好多 o野臨場的，雖然係拍緊戲好投入，但佢突然之間做 o的 o野出來係好 surprise ，令到你笑到收唔到口，笑到導演鬧唔好玩啦，個心係心急的，想快 o的拍完收工，但真係笑到無辦法收口。因為我笑，佢見到我個樣又忍唔住笑，係好開心！

但係《審死官》距離依家己經幾年？

好多年啦，越來越搵唔到呢 o的值得大笑的 o野囉！

上一次為乜事而喊？

咁有好多，喊的機會率比笑的多好多，喊有時係情緒的波動，覺得自己幾無助。我好少係人面前喊，係屋企喊的時間多，我係幾感性，我睇一部戲可以喊七次，上一次喊得最厲害係 ..... 你唔知有無睇【鬼眼】，係戲院喊得太醜樣，咁我會係屋企租碟睇，【鬼眼】我係喊到 woo...woo... ，坐係我旁邊的係叫做蔡一智。

依家對死亡的睇法？

唔係恐懼 ..... 我只會覺得有另外一個世界，可能只係無呼吸個剎那係驚一驚，之後你的靈魂去 o左邊度唔係太恐怖的，即係我睇死亡唔係睇得咁恐怖，除非有 o的人自殺，跳樓，果 o的感覺就好恐怖，你見到呢 o的場面係會恐怖。如果一個人係病，或其他病死亡，我覺得係一個命數，係幾難避免的。

你自己由細到大有無一刻諗過想死？

有，成日都諗 ...... 係做到想死個隻 .... 哈哈！

唔開心的時候咪有，我諗細個的時候實有，任性，大家都會幾唔珍惜，我依家成日同的年青的朋友講呢樣 o野，珍惜生命，好多人鍾意玩割脈，無啦啦話讀書壓力大就走去跳樓，你其實覺得幾無謂，壓力大係個剎那，所有 o野都係「一念之差」，唔好諗得咁壞咪得纙，欠人錢咪還囉，我會覺得有命就可以還，無命講乜都無用啦。

有好多人俾好多錢出去，都係求身體健康，有的人唔係 o架，身體好健康，無啦啦玩割脈，我覺得佢 o地應該用 o下個腦，爸爸媽媽點去培育佢 o地，養到咁大個人，其他 o野唔好講，用咁多心機，花咁多心血，你咁樣做係幾咁不負責任！做人都係一個責任，我地唔可以話身體係我的，我鍾意點做都得，唔係 o架，唔係你，身體係借番來的。其實四肢健全係好難，有 o的人先天性有缺憾，佢 o地去邊度搵，係無得搵，有 o的人咁唔珍惜，我覺得係好可惜的。

早前梅姐上 o左去華仔的網站公司睇過，咁究竟兩個會唔會有合作機會呢？一向都知道華仔係相當之勤力，梅姐又點樣睇呢？

我真係無佢咁大的決心同恆心，同埋我一對住 o的電器的 o野，我就會開始手忙腳亂，我屋企的 o野好簡單，最好係兩個制可以搞掂。

我有一邊眼散光得好厲利，就係因為拍戲成日睇的光，所以叫我集中睇住部電腦入面的 o野會係幾辛苦，同埋我真係唔係咁大興趣係電腦方面，你話我唔跟得上潮流又好，乜都好啦，我覺得電腦係一個趨勢，一個大趨勢，人人都要學。但另一方面，我覺得唔好沉迷，有好多外國的先例，好多細路仔成日對住部電腦已經唔同人溝通，佢 o地慢慢會變自閉症，同埋潛意識講大話。有好多人同屋企人已經唔再講 o野，大家對住部電腦咁又一日。

我覺得人 o的肌肉開始收縮，因為你又唔行啦，唔運動啦，連買 o野都上網 shopping ，有乜癮？點解上天要俾個口你，係用來講 o野，表達自己，你乜都靠部電腦！咁我覺得呢樣 o野係應該要識，但唔係俾你一日 24 小時都對住，唔係一個代替品，人與人之間應該要講，乜 o野事都要講，唔係靠電腦，電腦係一個死物。呢個世界，人係群體生活，係要靠互相傳遞訊息，係要有乜都你話俾我知，我話俾你知。

點解要唱歌？點解要有音樂？點解要拍電影？呢個係一個發洩，你唔叫唔講，慢慢咪變 o左自閉囉。自己同自己講 o野，總要係個腦入面，唔係講出 o黎，自己講自己答，慢慢變 o左我係咁 o架啦。

我覺得呢個世界科學太先進，同時都影響緊人，一 o的基本的事情都唔會再做，人好以無乜用咁。

我唔係「危言聳聽」，唔係叫大家唔用，而係唔好太沉迷，用得其所，同埋你知道點樣利用佢，就係你去玩緊部電腦，你去利用緊佢幫你做 o野，用得唔 o岩的話呢，係佢利用緊你，你無 o左佢就唔識做第二樣，咁你咪即係俾佢玩返你轉頭。我永遠都唔會俾一樣 o野去 control 自己，係我去 control 個樣 o野，呢個先係正確的。

係呀，其實每樣事都要有一個 balance ，但係因為大家想溝通但又無乜機會同你溝通，因而可能阿梅會有個人網頁出現，大家會知道佢多好多 o野？

呢樣 o野我地都會做，呢個都係好好的方法，有好多歌迷真係無乜渠道知道我太多的事，呢個會係我 planning 慢慢會做的事，呢個只不過係想同 o的歌迷無乜接觸之下，但係我想大家知道我好好，我唔可以話日日見報，咁網上面我可以話俾歌迷知係呢個月我有乜 o野特別 o野做，其他時間我好好，大家唔駛擔心我，呢樣係好簡單 o的 o野。同埋會收集番以前的資料，大家想知想睇想知的 o野。

大家好想知同你合作的伙伴，有乜條件去選擇？

我其實講來講去，無論合作的伙伴，乜都好，都覺得係一個緣份，緣份係最重要，大家舒服，盡量係令到大家都輕鬆，但係又會做到 o野，最好係大家俾到大家的意見，係做到的，唔係辛苦的。』

咁希望快的係網上見到梅姐以前的 o野啦，同埋跟住佢做的唔同事情啦，繼續想知梅姐有幾 happy 的話，大家可能上網可以知道的。

I'm so Happy！

唔該晒，梅姐。

多謝你！

網主感想：一個連續五天的電台訪問，我覺得個訪問幾正，於是把它轉化為文字版與大家分享。